Манъи шабакаҳои иҷтимоӣ дар Иттиҳоди Аврупо

Иттиҳоди Аврупо қарор аст рӯзи 17-уми сентябр тарҳи қонуни наверо барои муҳофизат аз кӯдакон дар баробари осебҳои шабакаҳои иҷтимоӣ ироа кунад. Тарҳе, ки мумкин аст дастрасии афроди зери 13 ё 15-сола ба ин шабакаҳоро манъ кунад.

Ба гузориши хабаргузории “Франс-пресс”, Урсула фон дер Ляйен, раиси Комиссияи Аврупо як рӯз пеш аз ироаи тарҳ маҳдудияти синнии пешниҳодиро дар Парлумони Аврупо эълон хоҳад кард.

Ин тарҳ бо унвони “Қонуни кӯдакони Иттиҳоди Аврупо” ҳамчунин ширкатҳоро вазифадор мекунад маҳсулоти худро ба шевае тарҳрезӣ кунанд, ки шахсро вобаста накунад ва имкони истифодаи аз ҳад зиёд аз онҳоро аз байн барад.

Ҳамзамон, ҳукумати Фаронса рӯзи 14-уми сентябр нусхаи ислоҳшудаи тарҳи манъи истифодаи афроди зери 15-сола аз шабакаҳои иҷтимоиро барои баррасӣ ба Комиссияи Аврупо ироа кард.

Шурои Қонуни асосии Фаронса нусхаи қаблии ин қонунро дар миёнаҳои моҳи август бинобар маҳдуд кардани ғайризарурии озодии баён бекор карда буд.

Нигарониҳо дар бораи таъсири шабакаҳои иҷтимоӣ ба саломатии равонӣ ва ҷинсии кӯдакон дар кишварҳои мухталиф афзоиш ёфтааст. Австралия нахустин кишваре буд, ки истифодаи афроди зери 16-сола аз ин шабакаҳоро манъ кард.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube