МММС “Тамчӣ” дар соҳили кӯли Иссиқкӯл маркази молиявӣ мекушояд

Минтақаи махсуси молиявӣ ва сармоягузории “Тамчӣ” (МММС “Тамчӣ”) эълон кард, ки нахустин маркази молиявии худро дар соҳили кӯли Иссиқкӯл ифтитоҳ мекунад.
Ба иттилои маъмурияти минтақа, дар маркази мазкур дафтари ширкати идоракунии МММС ҷойгир шуда, инчунин инфрасохтори зарурӣ барои фаъолияти ширкатҳои резидент фароҳам оварда мешавад.

Гуфта мешавад, маркази тиҷоратӣ масоҳати 3850 метри мураббаъ дошта, аз биноҳои корӣ, минтақаҳои ҳамкорӣ, толорҳои конфронс ва утоқҳои мулоқот иборат мебошад. Ҳамчунин, дар оянда кушодани тарабхона ва қаҳвахона дар назар аст.

Раиси Шӯрои идоракунии МММС “Тамчӣ” ва вазири адлияи Қирғизистон Аяз Баетов гуфтааст, ки оғози фаъолияти марказ қадами аввал дар рушди минтақаи нави молиявӣ ба ҳисоб меравад.

Ба иттилои ӯ, пеш аз ифтитоҳи марказ ширкати идоракунӣ таъсис дода шуда, нақшаи рушди минбаъда ва қисми аввали санадҳои танзимкунанда қабул гардидааст.

МММС “Тамчӣ” тибқи қонуни Ҷумҳурии Қирғизистон аз 10 июли соли 2025 дар ҳудуди тақрибан 6000 гектар замин дар соҳили Иссиқкӯл таъсис дода шудааст.
Тибқи маълумоти расмӣ, барои ширкатҳои резидент як қатор имтиёзҳо, аз ҷумла сабукиҳои андозӣ ва имкони фаъолияти ҳуқуқӣ дар асоси меъёрҳои ҳуқуқӣ пешбинӣ шудаанд.

Мақомоти Қирғизистон ният доранд, ки то соли 2035 дар ҳудуди ин минтақа ҳазорҳо ҷойи корӣ таъсис дода, садҳо ширкатро ҷалб намоянд.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube