Назаралӣ Орифов – Сафири нави Қирғизистон дар Тоҷикистон

Назаралӣ Орифов сафири фавқулода ва мухтори Қирғизистон дар Тоҷикистон таъин гардид. Фармони дахлдорро 30 август Президенти Қирғизистон Содир Ҷабборов ба имзо расонд. Дар ин бора расонаҳои расмии Қирғизистон хабар доданд.

Орифов дар ин мақом Эрлан Абдилдаевро иваз кард, ки аз моҳи апрели соли 2022 роҳбарии намояндагии дипломатии Қирғизистон дар Душанберо ба уҳда дошт. Абдилдаев моҳи июли соли равон аз вазифаи сафир дар Тоҷикистон озод ва баъдан сафири Қирғизистон дар Маҷористон таъин гардид.

10 июли соли равон дар робита ба анҷоми маъмурияти дипломатии Абдилдаев дар Тоҷикистон, ӯро вазири корҳои хориҷии Тоҷикистон Сироҷиддин Муҳриддин ба ҳузур пазируфт. Дар ин мулоқот ҷонибҳо масъалаҳои ҳамкории ду кишварро баррасӣ карда, вазири корҳои хориҷӣ аз саҳми сафир дар таҳкими муносибатҳои Тоҷикистону Қирғизистон изҳори сипос намуд.

Назаралӣ Орифов кист?

Назаралӣ Орифов 28 апрели соли 1970 дар деҳаи Қара-Булоқи ноҳияи Лайлаки вилояти Бодканди Қирғизистон таваллуд шудааст. Ӯ Донишгоҳи технологии Ошро бо ихтисоси марбут ба ташкили ҳаракати роҳ хатм кардааст. Ҳамин тавр, ӯ ҳоло 56-сола аст, на 55-сола.

Фаъолияти меҳнатиашро дар бахши хусусӣ оғоз кардааст. Солҳои 1994 – 1997 корхонаи хусусии «Эрдик»-ро роҳбарӣ намуда, баъдан ба соҳибкорӣ машғул шуда, роҳбарии ширкатҳои «Прагма Инк» ва «Гефест»-ро ба уҳда доштааст.

Соли 2007 Орифов вакили кенеши шаҳри Ош интихоб шуд. Солҳои 2009 – 2010 роҳбарии раёсати минтақавии Хазинаи суғуртаи ҳатмии тиббиро дар Ош ба уҳда дошт.

Солҳои 2010 – 2015 аз ҳизби «Республика» вакили даъвати панҷуми Жогорку Кенеш – парлумони Қирғизистон буд. Соли 2016 ба ҳайати Комиссияи марказии интихобот ва раъйпурсии Қирғизистон шомил шуда, соли 2020 ваколаташро пеш аз муҳлат қатъ кард.

Моҳи майи соли 2021 Назаралӣ Орифов консули генералии Қирғизистон дар шаҳри Алматои Қазоқистон таъин шуд ва то моҳи июни соли 2024 дар ин мақом фаъолият кард.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube