Раҳим Азимов бори сеюм вакили Думаи давлатии Русия интихоб шуд

Раҳим Азимов, сиёсатмадори зодаи Тоҷикистон, барои бори сеюм вакили Думаи давлатии Русия интихоб гардид. Номи ӯ дар рӯйхати вакилони Думаи давлатии даъвати IX қарор дорад.

Раҳим Азимов аз «Русияи воҳид» интихоб шуд

Интихоботи вакилони Думаи давлатии Русия аз 18 то 20 сентябри соли 2026 баргузор шуд. Комиссияи марказии интихоботии Русия рӯзи 25 сентябр натиҷаҳои ниҳоии интихоботро тасдиқ кард.

Раҳим Азимов аз ҳизби «Русияи воҳид» ширкат карда, тибқи маълумоти пешниҳодшуда, аз рӯйхати ҳизбӣ соҳиби мандати вакилӣ шудааст.

Дар маҷмӯъ, ба Думаи давлатии Русия 450 вакил интихоб мешаванд: 225 нафар аз рӯйхати ҳизбӣ ва 225 нафар аз ҳавзаҳои якмандатӣ.

Раҳим Азимов кист?

Раҳим Азимов 16 августи соли 1964 дар шаҳри Шӯроби ноҳияи Исфараи Тоҷикистон таваллуд шудааст. Ӯ соли 1986 Донишкадаи кӯҳии Ленинградро хатм кардааст. Баъдан дар сохторҳои давлатӣ ва ҷамъиятии Русия фаъолият намудааст.

Азимов бори аввал соли 2016 вакили Думаи давлатии Русия интихоб шуда, соли 2021 низ мандати вакилӣ гирифта буд.

Дар Думаи давлатии даъвати VIII ӯ вазифаи муовини якуми раиси Кумитаи амният ва мубориза бо фасодро ба уҳда дошт.

Агар интихоб шудани ӯ дар даъвати IX расман тасдиқ шавад, мандати нав барои Раҳим Азимов сеюмин давраи пайдарпайи фаъолияти вакилиаш дар Думаи давлатии Русия хоҳад буд.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube