Сохтмони иншооти муосир дар бозори сӯхтаи Бохтар

Маъмурияти ҶДММ “Фаровон — Қӯрғонтеппа”-и шаҳри Бохтар ба корҳои барқарорсозии қисмати сӯхтаи бозор шуруъ карданд. Ба хотири тезонидани суръати корҳои сохтмонӣ 300 сохтмончӣ ва 20 техникаи зарурӣ ҷалб шудааст.

Ҳайдар Шерхонзода, сардори ҶДММ “Фаровон — Қӯрғонтеппа” дар суҳбат бо Pressa.tj гуфт, ки “талош дорем то ҷашни Ваҳдати миллӣ растаҳои сӯхтаи фурӯшандаҳои бозор сохта шаванд”.

— Барои пӯшонидани болои растаҳои савдо баъзан маҳсулотро аз собиқ Маркази савдои Султони Кабири шаҳри Душанбе меорем,-афзуд вай.

Ҳамчунин, дар дохили бозор бунёди ду бинои баландошёна барои соҳибкорон шуруъ мешавад.

“Дар таҳхонаи бозор ҳавзҳои обғундорӣ низ ташкил мешаванд. Хароҷоти корҳои сохтмонӣ аз ҳисоби маъмурияти ҶДММ “Фаровон — Қӯрғонтеппа аст. Барои соҳибкорону фурӯшандаҳои бозор шароити хуб муҳайё карда мешавад”,- афзуд ҳамсуҳбатамон.

Сӯхтор дар ҶДММ “Фаровон — Қӯрғонтепа”-и шаҳри Бохтар шаби 1-уми июли соли равон сар зад. Ситоди бартарафсозии оқибатҳои сӯхтор сабаби асосии оташ гирифтани бозорро пайвасти ноқилҳои барқӣ ва кабелҳои барқии ҶДММ “Ганҷина-3” мегӯянд. Зарар аз сӯхтор бошад, 3 миллиону 200 ҳазор сомонӣ ҳисобида шудааст.

Ҳамчунин, дар оташсӯзии шаби 1-уми июн 90 дарсади бадани соҳибкор Маҳмад Сафаров сӯхта буд, ки баъдан дар беморхонаи вилоятии ба номи Бӯрӣ Воҳидови шаҳри Бохтар вафот кард.

Машраби АЛОВИДДИН

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube