Дар тобистон чӣ қадар об бояд нӯшид?

Бо фаро расидани фасли тобистон ва баланд шудани ҳарорати ҳаво талаботи организм ба об бештар мешавад. Агар дар рӯзҳои муқаррарӣ баъзе одамон ба миқдори камтари моеъ қонеъ шаванд, дар ҳавои гарм аз ҳисоби арақкунӣ бадан об ва намакҳои минералии зиёдеро аз даст медиҳад. Аз ин рӯ, табибон таъкид мекунанд, ки риояи реҷаи дурусти нӯшидани об яке аз шартҳои асосии нигоҳ доштани саломатӣ дар фасли гарм ба шумор меравад.

Мутахассисони соҳаи тиб мегӯянд, ки барои ҳамаи одамон як меъёри ягонаи нӯшидани об вуҷуд надорад. Талаботи организм ба моеъ аз вазни бадан, синну сол, фаъолияти ҷисмонӣ, шароити иқлим, тарзи зиндагӣ ва ҳатто вазъи саломатии шахс вобаста аст. Бо вуҷуди ин, духтурони терапевт ва диетологҳо тавсия медиҳанд, ки дар рӯзҳои гарм барои ҳар 30 килограмм вазни бадан на камтар аз як литр об истеъмол карда шавад. Яъне, агар вазни шахс 60 килограмм бошад, ӯ бояд дар як шабонарӯз ҳадди ақал ду литр об бинӯшад. Барои шахси 90-килограмма бошад, ин миқдор на камтар аз се литрро ташкил медиҳад.

Ба гуфтаи табибон, дар гармӣ организм тавассути арақ миқдори зиёди моеъро аз даст медиҳад. Агар ин талафот сари вақт ҷуброн карда нашавад, фаъолияти бисёр узвҳои ҳаётан муҳим халалдор мегардад. Пеш аз ҳама, хун ғафстар мешавад, ки ин метавонад хатари пайдоиши бемориҳои дилу рагҳо, баланд шудани фишори хун ва ташаккули лахташавии хунро зиёд намояд. Илова бар ин, норасоии об боиси хастагӣ, сустшавии қобилияти фикрронӣ, дарди сар, хушкшавии пӯст ва кам шудани нерӯи ҷисмонӣ мегардад.

Мутахассисон барои рафъи ташнагӣ пеш аз ҳама нӯшидани оби одиро тавсия медиҳанд. Оби маъданӣ низ, агар аз рӯйи меъёр истифода шавад, метавонад барои пур кардани намакҳои минералии аздастрафта муфид бошад. Ҳамчунин, оби лимӯ ва чойҳои гиёҳӣ аз беҳтарин нӯшокиҳо дар рӯзҳои гарм маҳсуб мешаванд. Онҳо на танҳо ташнагиро мешикананд, балки ба организм ҳисси тароват мебахшанд.

Дар айни замон, духтурон таъкид мекунанд, ки чойи сиёҳ ва чойи кабуд наметавонанд талафоти моеъи организмро пурра ҷуброн кунанд. Аз ин рӯ, онҳо набояд ҷойгузини оби одӣ гарданд. Ҳатто агар шахс чанд пиёла чой нӯшида бошад ҳам, бояд ба қадри кофӣ оби тоза истеъмол кунад.

Нӯшокиҳои газноки ширин ва ҳамаи намудҳои шарбатҳо, хоҳ тару тоза ва хоҳ бастабандишуда, барои истеъмол дар ҳавои гарм тавсия дода намешаванд. Сабаб дар он аст, ки аксари онҳо миқдори зиёди шакар доранд. Шакар ташнагиро бештар мекунад ва метавонад мубодилаи моддаҳоро халалдор созад. Истеъмоли аз ҳад зиёди чунин нӯшокиҳо инчунин хатари зиёд шудани вазни бадан ва баланд шудани сатҳи қанди хунро афзоиш медиҳад.

Табибон ҳамчунин маслиҳат медиҳанд, ки обро якбора не, балки дар давоми рӯз ва ҷуръа-ҷуръа нӯшидан беҳтар аст. Ин тарзи истеъмол имкон медиҳад, ки об беҳтар ҷаббида шуда, ба кори дилу гурдаҳо бори изофӣ наорад.

Дар баробари ин, барои одамоне, ки гирифтори бемориҳои дил, гурда, ҷигар ё дигар бемориҳои музмин мебошанд, меъёри истеъмоли об метавонад аз тавсияи умумӣ фарқ кунад. Аз ин рӯ, чунин шахсон бояд ҳатман бо духтури худ машварат намуда, реҷаи мувофиқи нӯшидани обро муайян созанд.

Дар фасли тобистон об беҳтарин воситаи нигоҳ доштани саломатӣ мебошад. Риояи реҷаи дурусти нӯшидани моеъ метавонад организмро аз беобшавӣ муҳофизат карда, фаъолияти муътадили дил, рагҳои хунгард ва дигар узвҳоро таъмин намояд.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube