Роҳзани пуртаҷриба бо тахаллуси «Фат» дастгир шуд

Хадамоти матбуоти ВКД аз дастгир шудани як нафар роҳзани пуртаҷрибаи мусаллаҳ хабар дод.

Тибқи маълумоти ВКД ин марди 49-сола сокин шаҳри Ҳисор буда, бо тахаллуси «Фат» машҳур будааст. Номбурда пештар ҳам бо содир кардани ҷинояти роҳзанӣ ва қочоқи маводи мухаддир солҳои 2002-2013 дар Тоҷикистон ва Русия суд шудааст.

Гуфта мешавад, ки ҷинояткор 24 сол пеш, 15-уми ноябри соли 1999, бо ҳамроҳии дигар аъзои ҷинояткори худ марди 46-солаи сокини ноҳияи Ёвон бо силоҳи оташфишон мусаллаҳ шуда, бо мақсади роҳзанӣ ғайриқонунӣ вориди хонаи истиқоматии зани 59-солаи сокини шаҳри Душанбе шуда, бо таҳдиди зӯроварӣ аз онҷо 1 адад «видеомагнитофон», 1 адад куртаи чармин, ҷавоҳироти гуногуни тиллоӣ, 1 адад дарзмоли тамғаи «Финикс»-ро тасарруф намуда, аз ҷойи ҳодиса ғайб задааст.

Манбаъ зарари расонидашударо 1 миллиону 710 ҳазор рубли русӣ таъин кардааст. Нисбати гумонбаршаванда тибқи Кодекси ҷиноятии Тоҷикистон парванда оғоз карда шуда, тафтишот идома дорад.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube