Аз таҳти дил бихандед!

Булбул

Рӯзе Булбул ном писарбачае ба боғ гелосхӯрӣ даромадааст. Ногоҳ боғбон дар болои дарахт гелосхӯрии ӯро дида, гуфтааст:

— Бача, чӣ ном дорӣ?

— Булбул,- ҷавоб додааст ӯ.

— Агар булбул бошӣ, суруд хон,- хоҳиш кардааст боғбон.

Боғбон овози гӯшхарошу нофорами ӯро шунида, гуфтааст:

— Наход, ки булбул ҳамин хел хонад?

Бача аз болои дарахт ҷавоб додааст:

— Булбули гелосхӯр ҳамин хел мехонад.

Ширин

Марде зариф зани ҷамилаеро диду гуфт:

— Чӣ шавад, эй хотун, агар рухсат фармоӣ, ки туро бичашам ва чошнӣ гирам, то бубинам, ки ту ширинтарӣ ё зани ман?

Зан гуфт:

— Бирав, аз шавҳарам бозпурс, ки ҳардуро чашидааст, то ӯ хотирнишони ту кунад.

Харгӯшак

Писарбачае аз модараш мепурсад:

— Оча, харгӯш гап мезанад?

— Не, бачаҷон. Харгӯш фақат дар филми тасвирӣ гап мезанад.

Писарча мегӯяд:

— Не, очаҷон. Падарам дишаб бо телефон «Харгӯшаки ман, назди хона биё, бинамат» гуфт.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube