Даргузашти Азим Байзоев, устоди ДМТ

Азим Байзоев, устоди Донишгоҳи миллии Тоҷикистон дар синни 66-солагӣ аз олам даргузашт. Ӯ ҳамчун дотсент дар кафедраи филологияи эрони факултети забонҳои Осиё ва Аврупои ин муассисаи олӣ фаъолият дошт.

Азим Байзоев, филолог-шарқшинос, ҳуқуқшинос, забоншинос ва мутарҷим буд.

Соли 1982 факултети забонҳои Шарқи УДТ ба номи В.И.Ленин (ҳоло Донишгоҳи миллии Тоҷикистон)-ро бо ихтисоси филолог-шарқшинос ва соли 2005 Донишкадаи ҳуқуқ ва андози Тоҷикистонро бо ихтисоси ҳуқуқшинос хатм кардааст. Солҳои 1982-1984 – ассистенти кафедраи филолгияи Эрон. Солҳои 1984-86 – хидмат дар Артиши Шуравӣ дар Афғонистон. С.-ҳои1986-89 – ассистенти кафедраи филологияи Эрон, 1989-1992 – ассистенти ҳамин кафедра. Солҳои 2012-2016 – ходими калони илмии Пажӯҳишгоҳи рушди маориф (ҳамкор), аз с. 2016 то имрӯз – сармутахассиси Академияи таҳсилоти Тоҷикистон (ҳамкор).

Соли 1981 – таҷрибаомӯзи Донишгоҳи Кобул, Афғонистон, с. 1997 – шунавандаи курсҳои дипломатӣ дар Академияи хизмати хориҷии Исломобод, Покистон, с. 2006 – муҳаққиқи Донишгоҳи Канзас, ИМА, с. 2015 – иштирокчии барномаи байналмилалӣ оид ба таҳсилоти фарогир, Йокогама, Япония. С. 2009-2013 дар Донишгоҳи давлатии Аризона (ИМА) аз забонҳои тоҷикӣ ва форсӣ дарс додааст.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube