Кори мунтахаби 15-солаҳои Тоҷикистон боз омад накард

Дар Варзишгоҳи марказии  шаҳри Ҳисор мусобиқаи байналмилалии «CAFA U-15 Girls Tournament 2017» ҷараён дорад, ки дар он дастаҳои мунтахаби духтарони 15-солаи Тоҷикистону Ӯзбекистон, Эрону Қирғизистон —  кишварҳои аъзои Ассотсиатсияи футболи Осиёи Марказӣ иштирок менамоянд.

28 август бозиҳои даври дуюм миёни ин дастаҳо баргузор шуд. Бахти варзишӣ дар ин давр низ ба рӯйи аъзои мунтахаби 15-солаҳои Тоҷикистон нахандид. Футболбоздухтарони тоҷик дар ин вохӯрӣ аз ҳамтони эронии худ бо ҳисоби 1:3 шикаст хӯрданд. Онҳо дар бозии аввал аз мунтахаби Ӯзбекистон бо ҳисоби калони 8:1 мағлуб гардида буданд. Ҳамин тавр, мунтахаби Тоҷикистон дар ду бозӣ ба дарвозаи худ 11 тӯб гузаронида, ҳамагӣ 2 гол задааст.

Дар бозии дигар футболбоздухтарони ӯзбек ҳамтоёни қирғизашонро 3:0 мағлуб карданд ва бо 6 хол дар ҷадвал ҷойи аввалро касб намуданд. Мунтахаби Эрон дар зинаи дуюм қарор гирифтааст.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube