Мошини “Хамер” меорам гуфт, вале наовард

Фиребгарӣ бисёр шудааст. Сокинон шикоят мекунанд. Вазорати корҳои дохилӣ аз силсилаи фиребгариҳо хабар дод.

Як сокини 44-солаи пойтахт соли 2013 як сокини Ховалингро фиреб дода, аз ӯ 27 ҳазор доллар гирифта, ваъда додааст, ки ба ӯ аз хориҷа мошини “Хамер” меорад. Сокини Ховалинг ба ШВКД-и Фирдавсӣ шикоят кардааст, ки то ҳол мошинро наовардааст.

Фиребгар ба ғайр аз ин ду мошин — «Порше Кайен» ва «БМВ»-ро ба маблағи 25 ҳазор доллар нархгузорӣ карда, аз ҷабрдида гирифтааст, вале маблағро барнагардонидааст.

Ба ШВКД дар ноҳияи Шоҳмансур ду нафар аз фиребгарӣ шикоят кардаанд. Зани 44-сола шикоят кардааст, ки моҳи июли соли 2022 як зани 35-солаи сокини А. Ҷомӣ аз ӯ 40 ҳазор сомонӣ гирифта, ваъда додааст, ки ба ӯ аз Душанбе хонаи якҳуҷрагӣ меёбад. Вале маблағро ба манфиати худ истифода бурда, барнагардонидааст.

Марди 60-солаеро аз ноҳияи А. Ҷомӣ моҳи июни соли 2022 зани 35-солаи ин ноҳия фиреб дода, 185 ҳазор сомонӣ гирифтааст. Ӯ ваъда додааст, ки ба ин маблағ барои марди 60-сола аз Душанбе хона мехарад, вале то ҳол ваъдаашро иҷро накардааст.

Аз рӯи ҳодисаҳои фиребгариву қаллобӣ ВКД тафтишот мебарад.