Дастаи мунтахаби Тоҷикистон дар мусобиқаи байналмилалии Минск ширкат кард
Дар доираи омодагӣ ба марҳилаи интихобии Ҷоми Осиё-2024 дастаи мунтахаби футзали Тоҷикистон таҳти роҳбарии сармураббӣ Пайрав Воҳидов дар мусобиқаи байналмилалӣ бахшида ба 956-умин солгарди шаҳри Минск ширкат кард.
Футзалбозони Тоҷикистон дар шаҳри Минск бо қаҳрамони Русия — бошгоҳи футзали КПРФ мусовӣ кард (4:4). Аз ҳайати дастаи Тоҷикистон Файзалӣ Сардоров дубл карду Дилшод Саломов ва Комрон Алиев якголӣ заданд.
Дар бозии дигар шогирдони Воҳидов аз дастаи мунтахаби Белорус бо ҳисоби 2:3 шикаст хўрданд. Голҳои Тоҷикистонро Умед Кузиев ва Бахтиёр Солиев заданд.
Дар ҷамъбаст дастаи мунтахаби Белорус бо чор хол ғолиби мусобиқа гардид. Бошгоҳи КПРФ-и Русия медали нуқра ба даст овард. Дастаи Тоҷикистон медалҳои биринҷиро соҳиб шуд.
Дастаи мунтахаби Тоҷикистон дар марҳилаи интихобии Ҷоми Осиё-2024 дар гурӯҳи «Е» бозӣ мекунад. Вохўриҳои ин гурӯҳ аз 7-ум то 11-уми октябр дар шаҳри Душанбе баргузор мешаванд. Рақибони дастаи футзали Тоҷикистон дастаҳои мунтахаби Ҳиндустон (7-уми октябр), Фаластин (9-уми октябр) ва Мянмар (11-уми октябр) ҳастанд.
Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube
Шарҳ