Шодихон Ҷамшед бо раисони Рашт, Тоҷикобод ва Лахш вохӯрд (аудио)

Муовини вазири тандурустӣ ва ҳифзи иҷтимоии аҳолии Ҷумҳурии Тоҷикистон Шодихон Ҷамшед ба минтақаи Рашт сафари корӣ анҷом дод.

Бино ба иттилои Вазорати тандурустӣ ва ҳифзи иҷтимоии аҳолии кишвар, нахуст Шодихон Ҷамшед аз Беморхонаи марказӣ, маркази саломатӣ ва таваллудхонаи ноҳияи Нуробод дидан намуда, бо фаъолияти шуъбаҳо, ҳолати таҷҳизоти тиббии муассисаҳои мазкур шинос шуда, инчунин бо роҳбарият ва кормандони онҳо суҳбати озоду ошкоро анҷом додааст.

Дар ҷараёни сафари кории хеш ҳамзамон Шодихон Ҷамшед ба ноҳияҳои Тоҷикобод, Лахш ва Рашт низ ташриф оварда, бо фаъолияти муассисаҳои тандурустии ноҳияҳои мазкур, аз ҷумла рафти хизматрасонии тиббӣ ба аҳолӣ ва рафти табобати як қатор беморон шинос шудааст.

Дар ҷараёни сафари кории хеш ҳамзамон муовини вазири тандурустӣ ва ҳифзи иҷтимоии аҳолии мамлакат бо раисони ноҳияҳои Рашт, Тоҷикобод ва Лахш вохӯрӣ намуда, бо онҳо масъалаҳои таъмиру тармим ва азнавсозии муассисаҳои тандурустӣ, дастгирии мутахассисони соҳа ва дигар масъалаҳоро мавриди баррасӣ қарор додааст.

— Маврид ба тазаккур аст, ки давоми солҳои соҳибистиқлолии давлатӣ соҳаи тандурустӣ ва ҳифзи иҷтимоии аҳолӣ низ дар минтақаи Рашт рушду пешрафт намуд. Махсусан дар ин давра дар ноҳияҳои минтақаи мазкур даҳҳо муассисаҳои тандурустии хуштарҳу замонавӣ бунёд ва мавриди истифода қарор дода шуданд, ки дар натиҷа сатҳ ва сифати хизматрасонии тиббӣ ба аҳолӣ боз ҳам беҳтар карда шуд. Айни замон низ дар минтақаи мазкур сохтмон, азнавсозӣ ва таъмиру тармими муассисаҳои тандурустӣ ва ҳифзи иҷтимоии аҳолӣ бомаром идома дорад,- меафзояд манбаъ.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube