Вундеркинди 3-сола аз Урметан (Видео)

Нӯъмонҷони Хотирмурод аз деҳаи Урметани ноҳияи Айнӣ бо дониши фавқулоддааш ҳамаро ба ҳайрат овард. Ӯ бо онки ҳамагӣ се сол дорад, пойтахтҳои ҳамаи кишварҳои дунёро медонад. Дар як видео Нӯъмонҷони сесола пойтахтҳои кишварҳои қораҳои гуногун – аз Аврупову Осиё то Африқо ва Амрикои лотиниро бе ягон хато номбар мекунад.

Видеои ҳайратовари ин кӯдаки тоҷикро амакаш Давлатмурод тоза рӯзи 24 феврал даршабакаи «Одноклассники» нашр кардааст. Давлатмурод бо ифтихор навиштааст, ки ин кӯдаки дона Нӯъмонҷон – писари бародараш Хотирмурод аз деҳаи Урметани ноҳияи Айнии вилояти Суғди Тоҷикистон аст.

Дар аввали ин видеои чордақиқагӣ як нафар ба Нӯъмонҷони сесола мегӯяд, ки ӯ ҳоло номи кишварҳои ҷаҳонро номбар мекунад ва Нӯъмонҷон бояд пойтахтҳои ҳар кадомашро бигӯяд.

Нӯъмонҷон, ки тангае дар даст дар назди девор рост истода, бозӣ дошт, розӣ мешавад.

Суолу ҷавоб аз суоли осон дар бораи пойтахти Тоҷикистон сар мешавад, ки Нӯъмонҷон зуд ҷавоб медиҳад: Душанбе.

Сипас дар тӯли чор дақиқа суолдиҳанда аз ин ба он гӯшаи дунёву аз ин қора ба қораи дигар ҷаҳида, Нӯъмонҷонро саволборон мекунад ва ин кӯдаки сесола бе ягон иштибоҳ пойтхатҳои кишварҳои мухталиф – аз Афғонистону Туркманистон то Ботсвана, Конго, Кабо-Верде, Чили, Венесуэла, Панама, Бирма, ҷазираҳои Комору ҷазираҳои Сейшел номбар мекунад.

Саволдиҳанда барои раҳгум занондани Нӯъмонҷон пойтахтҳои баъзе кишварҳоро батакрор ҳам мепурсад, вале ин кӯдак боз ҳам бе ягон иштибоҳ ба саволҳо посухи дуруст медиҳад.

Дар шарҳҳои зери ин видео ҳама ба ин дониши кӯдаки сесолаи тоҷик дар бораи пойтахтҳои дунё офарин хонда, эътироф мекунанд, ки худи онҳо бо вуҷуди синни баркамол ва хатми мактабҳои миёнаву ҳатто олӣ шояд номи ин қадар кишвару пойтахтҳои онҳоро дуруст надонанд.

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube