Шакарханд аз Холиқназар Ҷумъазода

Қадри зан

— Арзиши занҳо ин қадар баланд аст, ки қалин сол ба сол боло меравад?,- пурсид зангире аз Мундонӣ.

Мундонии пуртаҷриба гуфт:

— Арзиши воқеии занро вақти оиладоршавӣ на, балки вақти ҷудошавӣ мефаҳмӣ.

— Чӣ хел?,- ҳайратзада пурсид он нафар.

Мундонӣ бо табассум гуфт:

— Вақте мефаҳмӣ, ки нисфи дороиҳои ту низ аз ӯ будааст.

Дард — меҳмони хира

Мундонӣ ба аёдати дӯсте рафт, ки чанде пеш бемор шуда буд. Аз субҳ то шом паҳлуяш нишаста, аз даврони ҷавонӣ то имрӯзро ёд карда, дилбародирикунон гуфт:

— Он қадар дилозурда нашав. Дард меҳмон мегӯянд. Меояду меравад.

— Ин меҳмони мегуфтаат аз ту ҳам хиратар будааст. Нияти рафтан надорад,- посух дод бемор.

Дузди доно

Мундонӣ аз маҳбусе, ки бо ҷурми дуздӣ нишаста, озод шуд, пурсид:

— Чӣ дуздидӣ, ки 3 сол пушти панҷара рафтӣ?

— Нодон будаам, нодон, ҳазратам. Ҳамагӣ як телефон дуздида, 3 сол нишастам,- гуфт ва илова кард,- лекин аз маҳбас доно шуда баромадам, доно.

— Эҳе, ин дуздӣ ҳам доногиву нодонӣ дорад?,- бо кунҷковӣ суол кард Мундонӣ.

Ӯ посух дод:

— Бале, дузди беақл мисли ман фақат ин ё он ашёро аз дӯкон медуздад ва пушти панҷара меравад. Дузди доно тамоми дӯконро аз худ мекунад, вале дастгир намешавад.

… Зӯри наҳанг ҳам намерасад

Дар маҳфиле хеле шӯхиҳо кардем. Баъд аз маҳфил Зоҳиршо ба ман муроҷиат карда, гуфт:

— Акоҷун, дурӯғ зиёд гуфтеду гуноҳ содир кардед. Акнун як кило моҳибирён харед, якҷоя хӯрем, гуноҳҳоятон пок шавад.

Мундонӣ, ки он ҷо буд, гуфт:

— Гуноҳҳои ҳазратам он қадар зиёд шуда, ки дигар наҳанг хӯранд ҳам, пок намешаванд.

Баъд мебинӣ…

Ҷавони зангире аз Мундонӣ пурсид:

— Рост аст, ки солҳои пеш домод чеҳраи арӯсро баъди ба хона овардан медид?

— Дар ҳар давру замон чунин,- гуфт Мундонӣ.- Ҳоло ту ҳам чеҳраи воқеии арӯсро баъди чанд рўзи ба хона омаданаш мебинӣ.

Холиқназар ҶУМЪАЗОДА

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube