Искандар Маҳмудов – меъмори яке аз бузургтарин империяҳои саноатии Русия

Идомаи мақолаи “Тоҷикони муваффақ дар Русия”

Дар миёни соҳибкорони тоҷиктаборе, ки дар хориҷ аз Тоҷикистон ба муваффақиятҳои бесобиқа расидаанд, номи Искандар Маҳмудов ҷойгоҳи махсус дорад. Ӯ на танҳо яке аз сарватмандтарин намояндагони миллат дар ҷаҳон, балки аз ҷумлаи шахсиятҳои бонуфузи иқтисодии Русия низ ба шумор меравад. Тайи беш аз се даҳсола Искандар Маҳмудов дар ташаккул ва рушди саноати металлургӣ, кӯҳкорӣ, нақлиёт, логистика ва кишоварзии Русия нақши намоён бозидааст.

Искандар Қаҳрамонович Маҳмудов соли 1963 дар шаҳри таърихии Бухоро ба дунё омадааст. Гарчанде дар баъзе манбаъҳо ӯро ӯзбек меноманд, бисёре аз муҳаққиқон ва намояндагони ҷомеаи тоҷикони Бухоро ӯро аз тоҷикони бумии ин минтақа медонанд. Ин масъала солҳои зиёд мавриди баҳс қарор дошта бошад ҳам, худи Маҳмудов ҳамеша худро фарзанди муҳити фарҳангии муштараки Осиёи Марказӣ муаррифӣ кардааст.

Фаъолияти касбии ӯ аз соҳаи тиҷорати хориҷӣ оғоз гардид. Дар охири солҳои ҳаштодуми асри гузашта дар сохторҳои иқтисодии Иттиҳоди Шуравӣ фаъолият намуда, таҷрибаи арзишманд дар соҳаи муносибатҳои байналмилалии тиҷоратӣ ба даст овард. Ин таҷриба баъдтар барои ворид шуданаш ба ҷаҳони соҳибкории бузург замина гузошт.

Солҳои навадум, ки барои иқтисоди тамоми кишварҳои пасошуравӣ давраи тағйироти амиқ буд, Искандар Маҳмудов ба соҳаи металлургия ворид шуд. Маҳз дар ҳамин давра ӯ тавонист дар бозори металлҳои ранга мавқеи устувор пайдо кунад ва ба яке аз соҳибкорони муваффақи Русия табдил ёбад.

Номи ӯ пеш аз ҳама бо таъсис ва рушди Ширкати кӯҳию металлургии Урал (УГМК) пайванд дорад. Имрӯз ин ширкат яке аз калонтарин истеҳсолкунандагони мис, руҳ, ангишт ва дигар металлҳои стратегӣ дар Русия ва Авруосиё мебошад. Ба ҳайати он даҳҳо корхонаҳои кӯҳкорӣ, металлургӣ, энергетикӣ ва нақлиётӣ шомил буда, садҳо ҳазор нафар аз фаъолияти он баҳра мебаранд.

Коршиносон УГМК-ро яке аз сутунҳои асосии саноати металлургии Русия медонанд. Маҳсулоти корхонаҳои вобаста ба ин гурӯҳ на танҳо дар дохили Русия, балки дар бозорҳои Аврупо ва Осиё низ талаботи зиёд доранд.

Дар баробари металлургия, Маҳмудов ба рушди инфрасохтори нақлиётӣ низ таваҷҷуҳи махсус зоҳир кардааст. Ӯ дар таъсиси ширкатҳое иштирок кардааст, ки дар бахши сохтмони вагонҳои роҳи оҳан, интиқоли бор, терминалҳои баҳрӣ ва логистика фаъолият мекунанд. Баъзе аз ин корхонаҳо аз муҳимтарин унсурҳои шабакаи нақлиётии Русия ба ҳисоб мераванд.

Солҳои охир доираи фаъолияти иқтисодии ӯ боз ҳам васеъ гардидааст. Ба воситаи сохторҳои сармоягузории худ Маҳмудов ба бахши кишоварзӣ низ ворид шуда, ширкатҳои вобаста ба ӯ ба қатори бузургтарин соҳибони заминҳои кишоварзии Русия дохил шудаанд. Ҳамин тавр, фаъолияти ӯ имрӯз аз саноати вазнин то кишоварзӣ ва логистика доман паҳн кардааст.

Тибқи маълумоти маҷаллаи Forbes, Искандар Маҳмудов солҳои зиёд дар рӯйхати сарватмандтарин соҳибкорони Русия қарор дорад. Дороии ӯ қариб даҳ миллиард доллар арзёбӣ шудааст. Ин нишондиҳанда ӯро ба сафи бист нафар сарватмандони Русия ворид кардааст.

Аммо сарват танҳо як ҷанбаи нуфузи ӯст. Қудрати воқеии Маҳмудов дар шабакаи васеи муносибатҳои соҳибкорӣ, таҷрибаи идоракунии корхонаҳои азим ва ҳузури ӯ дар бахшҳои калидии иқтисоди Русия ифода меёбад. Аз ҳамин рӯ, бисёр коршиносон ӯро на танҳо миллиардер, балки яке аз меъморони саноати муосири Русия медонанд.

Соли 2022, баъди ҷорӣ гардидани таҳримҳои Ғарб нисбат ба як қатор соҳибкорони рус, Искандар Маҳмудов аз ҳайати роҳбарии баъзе ширкатҳои калони саноатӣ хориҷ шуд. Бо вуҷуди ин, таъсири ӯ ба равандҳои иқтисодӣ ва соҳибкорӣ ҳамоно назаррас боқӣ мондааст.

Барои хизматҳои бисёрсолаи худ ӯ бо як қатор мукофотҳои давлатӣ, аз ҷумла ордени «Барои хизматҳо дар назди Ватан» дараҷаи IV, медали ордени «Барои хизматҳо дар назди Ватан» дараҷаи II ва дигар нишонаҳои ифтихорӣ сарфароз гардидааст.

Имрӯз Искандар Маҳмудов аз ҷумлаи шахсиятҳое мебошад, ки номи онҳо бо рушди саноати бузурги Русия пайванд хӯрдааст. Ӯ намунаи соҳибкорест, ки аз муҳити Осиёи Марказӣ баромада, ба яке аз бонуфузтарин намояндагони элитаи иқтисодии Русия табдил ёфтааст. Аз ҳамин ҷост, ки дар ҳар гуна рӯйхати тоҷикони муваффақ ва таъсиргузори хориҷ аз кишвар номи Искандар Маҳмудов ҳамеша дар сафи пеш қарор мегирад.

(Идома дорад)

Таҳия, тарҷума ва такмили Шариф Ҳамдампур

Pressa.tj Бохабар аз гапи ҷаҳон бош!
Моро пайгири намоед Telegram, Facebook, Instagram, YouTube